Aardbewing is die ergste sedert 1931
2010-09-04 23:13
’n Groot aardbewing, wat 7,1 op die Richterskaal gemeet het, het Darfield in Nieu-Seeland eergisteraand getref. Dit is 30km wes van Christchurch, dié land se naasgrootste stad, geleë.Talle mense is ernstig beseer, maar niemand is dood nie in die aardbewing wat in ’n radius van 33 km in Canterbury verwoesting gesaai het.
Christchurch is bekend onder Suid-Afrikaners omdat die Springbokke en die Wallabies daar kragte meet in die Drienasies-rugbyreeks.
Die plaaslike televisiekanaal, TVNZ , het gister die verloop van die gebeure en die gevolglike chaos en paniek uitgestippel sedert die aardbewing Canterbury om 04:35 Nieu-Seelandse tyd (sowat 18:30 Vrydagaand Suid-Afrikaanse tyd) getref het:
07:55: Nog ’n groot naskok, wat 5,2 op die Richterskaal meet, volg. Bykans ’n dosyn naskokke het nou getref.
08:03: Bob Parker, burgemeester van Christchurch, versoek inwoners om vas te stel of bure, veral bejaardes, buite gevaar is.
08:38 : ’n Man word ernstig beseer toe ’n skoorsteen op hom val. Hy is in die waakeenheid in die hospitaal.
09:08: Die polisie waarsku mense om uit Christchurch se sakekern te bly.
09:54: Berigte lui dat die aardbewing selfs in Invercargill, 500 km suid van Christchurch, gevoel is.
09:55: Mense word versoek om net noodoproepe op selfone te maak. Baie gebiede is sonder water en elektrisiteit.
10:06: ’n Noodtoestand word afgekondig.
10:10: ’n Inwoner in Kaiapoi, noord van Christchurch, vertel aan ONE News: “Dit het so lank aangehou; ek het nog nooit ’n aardbewing soos dié een gevoel nie.”
10:25: Die weerburo waarsku mense teen swaar weerstoestande met baie reën en baie koue temperature.
10:26: ’n Groot brandstoftekort word in Christchurch ervaar.
10:28: Stakende radioloë skort hul staking op en begin weer werk.
10:31: John Carter, minister van burgerlike weermag, sê net twee mense is tot dusver ernstig beseer. Een is deur vallende glasstukke gesny.
10:58: Christchurch se sakekern is nou afgesper en inwoners word nie daar toegelaat nie om plundery te voorkom.
11:26: Parker sê skade aan die grond onder die stad kan erg wees en mense word aangeraai om water te bespaar en nie toilette te spoel nie.
11:33: Verskeie strate is nog gesluit, asook die Christchurch-lughawe en -spoorweë.
11:49: Reddingswerkers van Auckland is onderweg na Christchurch om te help om na mense te soek.
11:52: Die eerste minister, John Key, kom in Christchurch aan. Hy sê dit gaan ’n geruime tyd duur om die skade te bepaal.
12:29: Carter sê mense gaan vanuit Christchurch se sakekern ontruim word.
13:30: Die lughawe is weer oop, maar baie vlugte is vertraag.
13:55: Dit kan tot twee dae duur voordat elektrisiteitsvoorsiening herstel is.
14:15: Dit was die grootste aardbewing sedert 1931. Sterk naskokke word steeds gevoel. Die laaste een was om 12:18, wat 4,0 op die Richterskaal gemeet het.
14:36: Die Universiteit van Canterbury, asook die Lincoln-kraamhospitaal en die Burwood-kraameenheid, word gesluit.
14:42: Skade kan tot $1 miljard beloop.
17:00: Watervoorsiening bly ’n ernstige probleem vir die aand wat voorlê.
17:15: Die grootste naskok nóg, wat 5,4 op die Richterskaal meet, tref 10 km wes van Darfield.
17:20: ’n Aandklokreëling van 19:00 tot 07:00 word ingestel. Een persoon, ’n taxibestuurder, is nog in ’n ernstige toestand in die Christchurch-hospitaal.
21:00: Nog groot naskokke word deur die streek gevoel.
Bron: www.tvnz.co.nz