Aborsie: Romney keer vir 'n vale

Goew. Mitt Romney, die Republikeinse Party se kandidaat in die Amerikaanse presidentsverkiesing, moes gister vinnig wal gooi om te keer dat een van sy eie partygenote sy verkiesingskanse kwaai benadeel.

Die partygenoot is sen. Richard Mourdock, wat in ’n heftige tweegeveg om een van die deelstaat Indiana se senaatsetels betrokke is met die Demokratiese Party se Joe Donnelly.

Mourdock was in ’n televisiedebat met Donnelly betrokke toe hy gevra is wat sy houding is oor aborsie in die geval van verkragting. Mourdock se antwoord was dat hy meen lewe begin by bevrugting.

Lewe is ’n gawe van God, het hy gesê. “En selfs wanneer die lewe in daardie verskriklike situasie van verkragting begin, is dit iets wat God beplan het wat sou gebeur.”

Demokrate het onmiddellik met ’n groot geraas op dié stelling toegesak.

Debbie Wasserman Schultz, voorsitter van die Demokratiese Nasionale Komitee, het gesê Mourdock se standpunt “is ’n intrinsieke deel van die moderne Republikeinse Party se beleid insake vrouegesondheid”.

Sy het ’n beroep op Romney gedoen om die televisie-advertensie waarin hy kiesers vra om vir Mourdock te stem onmiddellik te onttrek.

Die Romney-kamp moes skarrel om die skade te beperk.

Andrea Saul, Romney se woordvoerder, het in ’n verklaring gesê Romney is dit nie eens met Richard Mourdock se standpunt nie en dit weerspieël nie sy siening nie.

Die rusie is belangrik teen die agtergrond van die stryd tussen Romney en pres. Barack Obama om die vrouestem. Romney loop agter onder vrouekiesers.

Hy het Obama die laaste weke begin inhaal en dis duidelik hy vrees Mourdock se uitlating kan hom terugdruk.

Mourdock se standpunt volg op ’n vroeëre een van Todd Akin, ’n ander Republikein wat in Missouri vir die senaat staan.

Akin het sowat twee maande gelede gesê verkragte vroue kan nie swanger word nie, want hul liggame het meganismes om dit te voorkom.

Intussen loop Romney en Obama steeds kop aan kop. Die meeste peilings wys Obama is ’n haarbreedte voor, maar dit is statisties onbeduidend.

Albei spits hulle nou toe op die sogenaamde “swing states”, soos Florida, Ohio, Wisconsin, Pennsilvanië, Iowa en Virginië.