Ali weer tuis na besoek aan hospitaal
2011-12-03 22:26
- Artikelopsies
- Deel
- Kry Rapport op
Die boks-ikoon Muhammad Ali sterk tuis aan nadat hy twee weke gelede weens ontwatering behandel is.
Hy is tuis, gelukkig en gaan aan met sy daaglikse roetine, het die Muhammad Ali-sentrum in ’n verklaring aan AFP gesê.
Aanvanklike berigte is volgens die sentrum uit verband geruk.
Die koerant Louisville Courier-Journal het vroeër berig Ali se vrou het verlede maand ’n ambulans gebel om hom hospitaal toe te neem.
“Ek dink nie hy het baie lank daar gebly nie,” het mnr. John Ramsey, ’n goeie vriend van Ali, aan die koerant gesê.
“Hy mag dalk nie in die rigting gaan waarvan ek of jy hou nie, maar niemand is aangesê om op ’n gereedheidsgrondslag te wees nie.”
Die tydskrif The Star en RadarOnline.com het ook vroeër berig Ali was ’n paar dae lank in die hospitaal nadat hy sy bewussyn by sy huis in Phoenix verloor het.
Daar word beplan om sy 70ste verjaardag op 19 Januarie in Louisville te vier.
- AFP