Assange kan hom nie roer
2012-08-18 23:15
Wie gaan die lankste asem hê?
Brittanje en Swede, of Julian Assange en Ecuador?
Dit is die vraag wat mense stel nadat Ecuador die afgelope week politieke asiel aan Assange, die stigter van WikiLeaks, verleen het.
Hy het sowat twee maande gelede by die Ecuadoriaanse ambassade in Londen om asiel gevra om sy uitlewering aan Swede te voorkom.
Assange word deur die Sweedse polisie weens twee klagte van verkragting gesoek. Hy voer aan die klagte is net ’n rookskerm en dat hy vervolgens aan Amerika uitgelewer sal word om weens die publikasie van tienduisende vertroulike Amerikaanse diplomatieke boodskappe gestraf te word.
Toe Ricardo Patiño, die Ecuadoriaanse minister van buitelandse sake, Donderdag aangekondig het asiel word verleen, het hy gesê dis waarskynlik dat Assange in ’n militêre hof in Amerika verhoor kan word, dat hy geen regverdige verhoor sal kry nie en dat hy wreed gestraf sal word – wat die doodstraf kan insluit.
Die Sweedse en Amerikaanse regering het dit ontken. Swede sê Amerika het geen versoek om uitlewering gerig nie en Amerika ontken dat hy sulke planne het.
Brittanje het aanvanklik gedreig om die ambassade met geweld binne te dring, maar het later teruggedeins.
William Hague, die Britse minister van buitelandse sake, het wel te kenne gegee sy land sal Assange nie toelaat om na Ecuador te reis nie.
Hy sal in hegtenis geneem word die oomblik wat hy sy voete buite die ambassade sit. Dit beteken hy sal onbepaald ’n gevangene in die ambassade wees. ’n Vriend sê hy bly in ’n ongemaklike kamertjie met ’n matras, oefenfiets en rekenaar met internettoegang.
Ironies genoeg is Assange, die groot voorstander van openheid en ’n vrye internet, nou onder die beskerming van ’n regering wat planne het om Ecuadoriane se toegang tot die internet te beperk.