Beethoven kla, kla, kla in ou brief
2012-01-14 23:30
- Artikelopsies
- Deel
- Kry Rapport op
’n Handgeskrewe brief deur die komponis Ludwig van Beethoven, wat by die Brahms-instituut in die stad Lübeck ontdek is, het liefhebbers van sy werk gaande.
In die brief kla die Duitse komponis oor sy gesondheid en finansies.
Volgens die instituut bevat die brief van ses bladsye die komponis se handtekening en die oorspronklike seël. Die brief was glo ’n poging om sy Missa solemnis te verkoop wat hy in 1823 voltooi het.
Beethoven vra in die brief die harpspeler en komponis Franz Anton Stockhausen om kopers vir dié stuk te help soek.
Volgens mnr. Stefan Weymar, musieknavorser aan die instituut, is die uittreksels wat die meeste trefkrag het die besonderhede oor sy persoonlike lewe, soos sy finansiële situasie en sy pogings om ’n tandarts op te soek.
Die brief se bladsye het al vergeel weens ouderdom en dit word met handskoene hanteer.
Beethoven, wat 53 jaar oud was toe hy die brief geskryf het, sê voorts die onderrig van sy nefie is baie duur en die seun sal finansiële steun ná die komponis se afsterwe nodig hê.
Die brief lyk slordig en is vol woorde wat uitgekrap of gekorrigeer is.
Weymar sê: “Hy het spontaan geskryf, soos hy gedink het. Soos sy gedagtes verander, het hy woorde verander.”
Die waarde van die brief word op meer as 100 000 euro's (R1,031 miljoen) gereken.
’n Inkopielys in Beethoven se handskrif met net ses woorde daarop is verlede jaar vir 60 000 euro's (R618 000) opgeveil.
- Reuters