Belangrik dat myners kophou tot Kersfees
2010-08-28 23:53
- Artikelopsies
- Deel
- Kry Rapport op
Copiapó (Chili). – ’n Gesonde geestestoestand is nou die grootste uitdaging vir die 33 vasgekeerdes in die Esteban-myn in die noorde van Chili.
Dokters en sielkundiges beraadslaag oor maniere waarop die mynwerkers se gemoedstoestand verbeter kan word terwyl hulle waarskynlik tot Kersfees 700m onder die grond vassit.
Vyf van die 16 passasiers wat in 1973 ’n vliegtuigongeluk in die Andesgebergte oorleef het deur van die lyke van ander passasiers te eet is ook op pad van Uruguay om te gaan raad gee.
Die mynwerkers is op 5 Augustus ná ’n grondstorting vasgekeer. Aanvanklik is gemeen dat almal dood is, maar 17 dae later is bevind dat hulle oorleef het.
Vandeesweek is ’n massiewe masjien met diamantpuntbore wat tonnels van 65cm wyd deur rots kan boor na die myn gestuur om met die reddingspoging te help. Die boor se topdrilspoed is egter net 20m per dag.
Die opgrawing het gister eers begin, met drie gate wat geboor is om voorraad en ventilasie aan die vasgekeerdes te voorsien en om met hulle te kommunikeer.
Reddingswerkers het die afgelope week begin om ontwateringstablette, glukose en suurstof by die vasgekeerdes te kry.
Maar hul beproewing is nog lank nie verby nie.
Vroeër die week is kameras afgestuur waarmee die myners elkeen ’n beurt gekry het om met hul families te kommunikeer. Almal het vertel hoe honger hulle is, maar bygevoeg dat hulle gesond is en tandeborsels nodig het.
Die beskutting waarin hulle is, is so groot soos die gemiddelde sitkamer en die mans kan darem rondloop. Die temperatuur wissel tussen 32°C en 34°C.
Kos sal eers binne die volgende paar dae afgestuur kan word, sodra die mans se spysverteringstelsels weer normaal is.
Die myners het tot nou elk op twee teelepels tuna, ’n slukkie melk en ’n koekie elke 48 uur oorleef.
Intussen is die eerste klag reeds teen mnr. Alejandro Bohn, die myndirekteur, ingedien.
Die myners se families het die mynbase vandeesweek gedagvaar op aanklagte dat hul familielede se lewens in gevaar gestel is weens hul werk in myne wat berug is om rotsstortings.
Kort ná die grondstorting het pres. Sebastian Piner van Chili twee direkteure van Sernageomin en sy land se mynveiligheidsreguleerder afgedank ná ’n verslag dat die myn heropen is sonder dat die veiligheidmatreëls verbeter is.
Die maatskappy het die bewerings ontken en gesê die dagvaardings gaan hulle bankrot maak. SAPA-AFP
- Rapport