Bobbejane saai chaos, maar beland ook in pot
2012-02-04 22:11
- Artikelopsies
- Deel
- Kry Rapport op
Bobbejane wat hul lyf grypdief hou, saai chaos om die grenspos tussen Zimbabwe en Zambië.
“Die bobbejane is ’n ernstige probleem wat dringend aandag moet geniet. Hulle beskadig reisigers se eiendom,” sê mnr. Tichaona Phiri, hoof van die Chirundu-grenspos aan die Zimbabwe-kant.
“Die bobbejane sal selfs mense byt of deur die gesig klap, sou reisigers probeer om hul besittings te beskerm.
“Daar was al baie klagtes van bobbejane wat vroue se handsakke steel of motors beskadig.”
Die grypdiewe fokus nie net op motors nie. Hulle sal selfs sakke koring oopskeur op vragmotors wat deur die grenspos gaan.
NewsDay berig daar is nie ’n enkele bobbejaan aan Zambië se kant van die grens nie.
Volgens ’n immigrasie-amptenaar is dit omdat bobbejane ’n fynproewersdis in Zambië is. Inwoners maak die bobbejane dus voor die voet dood.