Breivik eis om vrygelaat te word

Oslo. - Anders Behring Breivik (32), die Noor wat in Julie verlede jaar 77 mense in twee aanvalle vermoor het, het Maandag ’n hof in dié stad gevra om hom onmiddellik vry te laat.

Dit het ’n gespot ontlok by oorlewendes van sy aanvalle, wat in die openbare galery van die hof gesit het.

Sy slagting was ’n “voorkomende aanval teen verraaiers van die staat wat skuldig is aan ’n soort etniese suiwering omdat hulle ’n multikulturele samelewing voorstaan,” het Breivik, wat geen berou getoon het nie, aan die hof gesê.

“Ek aanvaar geen gevangenskap nie. Ek eis dat ek dadelik vrygelaat word,” het hy aan die hof gesê voordat beveel is dat hy aangehou word totdat sy verhoor op 16?April begin.

’n Hol gelag het uitgebreek in die deel van die hof waar die oorlewendes gesit het toe Breivik sy eis om onmiddellike vrylating herhaal het.

Breivik, geklee in ’n donker pak, het by sy aankoms in die hof sy geboeide hande eers op sy bors gedruk en toe na die mense in die hof uitgehou in wat mnr. Geir Lippestad, sy regsverteenwoordiger, bestempel het as ’n “ekstreem-regse saluut”.

“Hy wou die verregses wys hy is een van hulle,” het Lippestad gesê.

* Volg Rapport op Twitter en Facebook