Britse pa speel wit kaart en wen
2013-02-23 23:05
Die besluit van die Britse owerhede om twee Suid-Afrikaanse kinders uit die land te skop, het ’n mediastorm in die land ontketen toe die kinders se pa aan joernaliste gesê het sy wit kinders sal nie in “misdaad-geteisterde” Suid-Afrika oorleef nie.
Ná ’n reeks televisie- en radio-onderhoude en druk van die publiek het die Britse immigrasiekantoor die afgelope week van deuntjie verander.
Justin Tutt (29) se seun, Seth (8), en sy dogter, Leigh (5), sou in Maart gedeporteer word omdat Tutt glo nie genoeg verdien om hulle in Brittanje te hou nie en hulle nie vir welsyntoelaes in aanmerking kom nie.
Tutt het die kinders verlede maand in Kimberley kom haal om by hom te bly ná die selfmoord van hul Suid-Afrikaanse ma, sy eksvrou Deidre Tutt.
Brittanje se immigrasiewetgewing bepaal dat Seth en Leigh nie in die land kan bly nie omdat die kinders in ’n gesin moet bly wat minstens £22 500 (sowat R300 000) per jaar verdien.
Tutt verdien as kroegman £120 (R1 600) per week en sy verloofde is met kraamverlof.
Sy aansoek om vaste verblyfpermitte vir die kinders het misluk en hy moes hulle na Suid-Afrika stuur om in pleegsorg geplaas te word.
Tutt het meer as 20 prokureurs gaan sien, maar niemand kon help nie. As laaste uitweg het hy hom tot die media gewend. Hy het aan die media gesê sy grootste vrees is dat sy kinders vermoor of verkrag sal word in Suid-Afrika omdat hulle wit is.