Charlize hou haar lyf dalk oorlogjoernalis
2012-09-22 23:17
- Artikelopsies
- Deel
- Kry Rapport op
Nou word Charlize Theron dalk ’n oorlogverslaggewer.
Dié Suid-Afrikaans gebore aktrise voer samesprekings om ’n biografiese fliek oor Marie Colvin (56), ’n joernalis wat in oorloggebiede naam gemaak het, te maak.
Theron sal dalk ook die hoofrol in Marie Colvin’s Private War vertolk.
Colvin was 25 jaar lank die internasionale korrespondent van The Sunday Times in Engeland en Amerika. Dié bekroonde joernalis het ’n swart oogklap gedra nadat sy haar oog verloor het toe ’n handgranaat haar in Sri Lanka in die gesig getref het. Sy is in Februarie doodgeskiet toe sy uit Sirië verslag gedoen het.
Die rolprent sal geskryf word na aanleiding van ’n artikel oor Colvin wat in die tydskrif Vanity Fair verskyn het.
Theron en haar mederegisseur soek nog ’n skrywer vir die draaiboek.
Die vorige keer wat Theron in ’n rolprent gegrond op ’n ware verhaal was, het sy die rol van die reeksmoordenaar, Aileen Wuornos vertolk in Monster. Vir dié vertolking het sy ’n Oscar gewen.
Bronne: Daily Mail, The Guardian, Huffington Post