Die hare, die stap: dis ‘Diana’
2012-07-07 22:07
Die nuwe fliek oor Diana, prinses van Wallis, heet nou eenvoudig Diana en nie meer Caught in Flight nie.
Volgens cinemablend.com is dié besluit geneem omdat Diana baie meer onmiddellik “herkenbaar” sal wees as die meer “dramatiese” Caught in Flight.
Die hoofrol word deur die Britse aktrise Naomi Watts vertolk.
Diana word tans in Kroasië, Mosambiek en Londen geskiet.
Vroeë foto’s wys Watts kwyt haar goed van haar taak.
Sy het die Diana-stap, met een hand wat die rok vashou, tot die haarstyl en selfs daardie skaam laggie.
Diana gaan oor die laaste twee jaar van die prinses se lewe en word as ’n liefdesverhaal bestempel. Dit lig die sluier oor Diana se verhouding met die chirurg dr. Hasnat Khan.
Khan word vertolk deur Naveen Andrews, wat die bekendste is om sy rol as Sayid Jarrah in die TV-reeks Lost.
Die prinses was 36 toe sy op 31 Augustus 1997 in ’n motorongeluk in Parys, Frankryk, gesterf het.
Die fliek volg ook die verhouding met Dodi al-Fayed.
Watts (43) het al in rolprente soos 21 Grams en King Kong gespeel, maar word dikwels verkeerdelik as ’n Australiese aktrise gesien omdat sy haar loopbaan in die Australiese sepie Home and Away begin het.
Diana sal na verwagting in Februarie volgende jaar in Frankryk uitgereik word.
Watts het erken sy was erg op haar senuwees om die rol van die prinses te speel, berig die Daily Mail.
“Sy is deel van ons geskiedenis. ’n Merkwaardige vrou en fassinerend met ’n tragiese einde,” het Watts gesê.
Watts het na die voorstad Kensington in Londen verhuis om voor te berei vir die rol.
Sy het veral Diana se gunsteling- plekke soos The Harbour Club en Beauchamp Place as deel van haar voorbereiding besoek.