Die rolprent wat Islam beledig het
2012-09-13 13:27
- Artikelopsies
- Deel
- Kry Rapport op
Benghazi. – “Jy dra nie onderklere nie. Bedek jouself.”
“Jammer.”
Later, met sy kop op haar skoot: “Sien jy nog die duiwel? Sit jou kop tussen my bene. Sien jy nog die duiwel?”
Só lui van die dialoog in Innocence of Muslims, ’n amateuragtige fliek waarin die profeet Mohammed uitgebeeld word as biseksueel en ten gunste van buite-egtelike seks en pedofilie. Woede oor die fliek het glo bygedra tot die dodelike aanval op die Amerikaanse konsulaat in Benghazi, Libië.
Sam Bacile (56), ’n Israels-Amerikaanse eiendomsmakelaar wat blykbaar die fliek geskryf, regisseer en vervaardig het, het gesê die fliek is bedoel om Islam as ’n haatlike geloof uit te beeld.
“Islam is ’n kanker. Die fliek is politiek, nie oor geloof nie.”
Hy het gesê hy het sowat $5 miljoen (sowat R45 miljoen) van 100 Joodse skenkers gekry. Hy het glo 60 akteurs en 45 produksielede bymekaar gekry vir die fliek, wat verlede jaar oor drie maande in Kalifornië geskiet is.
Dele van die Engelse fliek is al sedert Julie stuk-stuk aanlyn beskikbaar, waaronder twee lokprente van meer as ’n minuut en byna 13 minute onderskeidelik. Dit het eers aandag begin trek toe iemand ’n uittreksel in Arabies vertaal het.
Die greep is oor Egiptiese TV vertoon waar dit bestempel is as ’n Kopties-Christelike en Amerikaanse sameswering om die profeet in ’n slegte lig te stel. Dit word deur Islamiete as ’n geloofsoortreding beskou om die profeet op enige manier uit te beeld. Bacile kruip nou weg.
Later in die lokprent word ’n vrou wat sê sy is ouer as 120 jaar deur twee kamele uitmekaar getrek nadat sy uitvaar oor die profeet se bloeddorstigheid.
* Die Amerikaanse ambassadeur in Libië, Chris Stevens, het op die herdenkingsdag van die 9/11-tragedie in New York in 'n aanval deur Islamitiese ekstremiste gesterf. 4 Amerikaners is dood en ten minste nog 12 mense is beseer in die voorval.
– AP, YouTube, Foxnews.com, Daily Mail, The Telegraph, Yahoo! News