Ghaddafi-uitspraak veroordeel

Leiers van die VN en EU het die naweek ontsteld gereageer op ’n versoek van Libië se pres. Moeammar Ghaddafi dat Moslems wêreldwyd ’n “heilige oorlog” teen Switserland moet voer.

“Ek dink dit is onverskoonbaar dat ’n staatshoof sulke uitsprake maak,” het mnr. Sergei Ordzhonikidze, direkteur-generaal van die VN, die naweek gesê.

Ghaddafi het Donderdag gesê Switserland is ’n heidense staat wat graag moskees verwoes en dat Moslems ’n djihad teen dié land moet voer.

Dit kom nadat Switsers onlangs in ’n referendum gestem het dat die bou van minarette (torings wat gewoonlik by moskees gebou word) in hul land verbied word.

“Enige Moslem in enige deel van die wêreld wat met Switserland saamwerk, verraai sy/haar geloof, (die profeet) Mohammed, God en die Koran,” het Ghaddafi gesê.

“Moslems moet na lughawens opruk en keer dat Switserse vliegtuie land. Moslems moet keer dat Switserse skepe hul hawens aandoen en hulle moet winkels en markte deursoek om te keer dat Switserse goed daar verkoop word.”

Die Switserse departement van buitelandse sake wou tot dusver nie op Ghaddafi se opmerkings reageer nie.

’n Woordvoerder vir die EU se departement van buitelandse sake het egter Ghaddafi se uitsprake as ”betreurenswaardig” bestempel.

“Dit kom op ’n tyd dat die EU juis nou saam met Switserland werk om ’n diplomatieke oplossing vir die twis tussen dié twee lande te kry,” het me. Lutz Guellner gesê.

Betrekkinge tussen Switserland en Libië is al sedert 2008 wankelrig toe ’n seun van Ghaddafi in’n Geneefse hotel in hegtenis geneem is op ’n klag dat hy huisbediendes mishandel het.

Hoewel hy later vrygelaat is, het Libië gereageer deur ’n olieboikot teen Switserland af te kondig, miljarde dollars uit Switserse bankrekenings te onttrek en twee Switserse sakemanne in Libië in hegtenis te neem.