Kate loop deur onder skerp tong

Den Haag. – Catherine, hertogin van Cambridge en vrou van prins William, is ’n  “winkelpop” sonder ’n eie persoonlikheid aan wie “bepaalde vodde gehang word”. Haar enigste doel in die lewe is om geboorte te gee aan ’n troonopvolger.

Dié heftige aanval op Kate is reeds op 4 Februarie deur die bekroonde skrywer Hilary Mantel in ’n lesing gedoen, maar die nuus daaroor het die media pas gister getref – en onmiddellik wye en woedende reaksie uitgelok.

Mantel is die skrywer van twee romans oor koning Hendrik VIII se ses vroue, waarvoor sy die Booker-prys ontvang het. Sy het die aanval gedoen in ’n lesing wat deur die London Review of Books gereël is en verskeie koninginne en adellike vroue van die Tudor-tyd tot vandag – met inbegrip van Kate – behandel.

Oor Kate het sy geen goeie woord gehad nie. Kate is “pynlik maer”, sy is deur ’n “komitee ontwerp en deur ambagslui gemaak, met ’n perfekte plastiekglimlag en die speke van haar ledemate met die hande gedraai en met vernis afgewerk”, iemand wat “heeltemal gedefinieer word deur die klere wat sy aan het”. Haar oë is “dood”.

Mantel het Kate ongunstig vergelyk met Anne Boleyn, tweede vrou van Hendrik VIII wie se kop uiteindelik afgekap is. Boleyn was ’n “magspeler, ’n slim en vasbeslote vrou”. Maar ofskoon Kate se kop nie in gevaar is nie, sal hul uiteindelike lot dieselfde wees: “Uiteindelik is Anne gewaardeer vir haar liggaamsdele, nie haar intellek of haar siel nie; dit was haar baarmoeder wat sentraal was ... ’n koninklike vrou is ’n koninklike vagina.”

Bowendien lyk Kate “so anders as Diana, wie se menslike onbeholpenheid en emosionele onvermoë uit elke gebaar geblyk het”.

Oor die koninklike familie het Mantel gesê hulle “het nie dieselfde moeite om aan te teel as pandas nie, maar pandas en koninklikes is net so duur om te bewaar en swak by die moderne omgewing aangepas”. Sarkasties het sy daarop laat volg: “Maar is hulle nie interessant nie? Is hulle nie mooi om na te kyk nie?”

Die lesing het reeds gister skerp reaksie uitgelok. Joe Little, redakteur van die tydskrif Majesty wat oor koninklikes verslag doen, het gesê: “Dit klink asof sy oor iemand praat wat sy nooit ontmoet het en van wie sy niks weet nie ... Dit kom uit die bloute. Dit lyk ongelooflik onvriendelik.”

Emma Barnett, die Daily Telegraph se vroueredakteur, het die lesing as “goedkoop en wreed” bestempel, terwyl die Daily Mail dit in die opskrif bo sy berig as “giftig” beskryf het. Ook Nick Barton, hoof van ’n welsynorganisasie wat deur Kate gesteun word, het die aanval afgekeur en gesê die hertogin is ’n “intelligente vrou”.

In haar verdediging het Mantel gister gesê Kate was nie haar teiken nie, maar die monargie as sodanig.