Koerant sê Lance skuld hulle

Die Sunday Times voel die onteerde fietsryer Lance Armstrong skuld hom dalk geld.

Dié Londense weekblad het vyf jaar gelede sowat £1 miljoen (sowat R14 miljoen) bestee om hom teen ’n lasteraksie deur Armstrong te verdedig. Dit het gekom nadat die koerant in 2004 beweer het Armstrong (41) gebruik onwettige middels.

Pas nadat Armstrong in ’n verdoemende verslag deur die Amerikaanse agentskap teen onwettige middels (Usada) van ’n gesofistikeerde opkikker­program beskuldig is, het Sunday Times aangedui hy oorweeg regstappe teen Armstrong, wat ’n klag van bedrog insluit.

Die koerant meen daar is ’n moontlikheid dat hy die geld wat hy aan die verdedigings­aksie bestee het, asook ’n skikkingsbedrag, kan terugkry.

Sunday Times en Armstrong het destyds buite die hof geskik. Die koerant het Armstrong toe ook om verskoning gevra.

Armstrong het in Augustus vanjaar aangekondig dat hy nie langer Usada se beskuldigings gaan beveg nie.

Hoewel hy meen Usada se verslag is ’n sameswering teen hom, is hy lewenslank uit fietsry geskors en van sewe Tour de France-titels gestroop.

Die verslag bevat onder meer beëdigde verklarings deur van sy voormalige spanmaats wat hom nie net van die gebruik van onwettige middels beskuldig nie, maar ook dat hy ’n “kultuur” van die gebruik van sulke middels in die span gevestig het.

Volgens Mark Fabiani, ’n woordvoerder van Armstrong, gaan hy nie kommentaar lewer op Sunday Times se dreigement van regsaksie nie. Armstrong ontken steeds die gebruik van enige onwettige middels.