Koninklike heuwels fantasties
2012-09-16 00:47
Christine van der Westhuizen
Asof kaalborsfoto’s van die toekomstige koningin nie genoeg is om die Engelse briesend in hul tee te laat stik nie, het dit aan die lig gekom dat intieme foto’s van haar van ’n veel warmer aard bestaan.
Dit is egter deur die Franse tydskrif wat die oorspronklike kaalfoto’s gepubliseer het van die hand gewys omdat dit “te woes” was.
“Ander koerante kan dit dalk publiseer, maar ons het daarteen besluit,” het Laurence Pieau, redakteur van die tydskrif Closer, volgens die Britse poniekoerant Daily Star gesê.
Die foto’s is twee weke gelede geneem terwyl prins William en Catherine, die hertogin van Cambridge, ontspan het by die luukse vakansievilla Château d’Autet in die suide van Frankryk wat aan lord Linley, die koningin se neef, behoort.
Dit is nie bekend wie die foto’s aan Closer verkoop het nie, maar daar is aanduidings dat verskeie fotograwe uit verskillende hoeke foto’s geneem het.
Closer se 14 foto’s is oor vyf bladsye versprei en Kate se borste kan op agt van die foto’s gesien word, terwyl ’n ander foto haar kaal agterwêreld wys terwyl William haar met sonroom insmeer.
Closer staar ’n hofgeding in die gesig nadat die koninklike paartjie ’n klag van privaatheidskending by die Tribunal de Grande Instance in Parys ingedien het.
Die tydskrif én die fotograwe kan ’n jaar tronkstraf en ’n boete van €45 000 (sowat R484 645) opgelê word.
Kate en William is oortuig as hulle nie optree nie, sal hulle net soos sy ma, prinses Diana, aan paparazzi-boelies blootgestel word.
Ondanks die dreigende hofsaak het die Italiaanse skindertydskrif Chi aangekondig hy beplan om 26 bladsye vol “vakansiefoto’s” van die koninklike paartjie te publiseer.
Sowel Closer as Chi word uitgegee deur die Mondadori-mediagroep, wat deur die voormalige Italiaanse premier Silvio Berlusconi besit word.
Huffington Post berig die redakteur van Chi, Alfonso Signorini, meen die foto’s wys die “alledaagse lewe van ’n baie beroemde, moderne, verliefde paartjie. Die feit dat hulle die toekomstige regeerders van Engeland is, maak dit interessant en aktueel.”
Intussen het ’n twiet van Piers Morgan, bekende televisie-aanbieder, baie reaksie ontlok: “Daar is ’n rede waarom die koningin nog nooit afgeneem is terwyl sy bostukloos was of kaal poker gespeel het nie. Dit word gesonde verstand genoem.”