‘Mad Max’ neem Namib op horings
2012-07-07 22:07
Die woestyn tussen Swakopmund en Walvisbaai is ’n miernes van bedrywighede oor die fliek Mad Max: Fury Road wat tans hier verfilm word.
Charlize Theron vertolk die hoofrol en sy word gereeld in die dorpe opgemerk.
By haar aankoms op die Walvisbaai-lughawe het doeanebeamptes haar paspoort in die vliegtuig gaan stempel. Toe het sy op die aanloopbaan in ’n motor geklim en is sy Swakopmund toe geneem.
Die produksiespan van sowat 800 mense gaan op Langstrand tuis en die akteurs woon in private huise in Swakopmund.
Volgens inwoners is die produksiespan al sedert Februarie in Namibië om die voertuie te bou en te toets.
Net die beste motorbestuurders word gebruik vir die waagtonele.
Die meeste van die bestuurders van die sowat 140 voertuie is Australiërs. Van elke voertuig word drie replikas gebou en dié werk word in ’n skuur in Walvisbaai gedoen.
Die brandweer- en verkeersafdeling van die Walvisbaai-munisipaliteit word ingespan om die voertuie tussen die verskillende punte te help reguleer. Volgens gerugte kos die fliek reeds $150 miljoen (nagenoeg R1,2 miljard). Verfilming eindig in die eerste week van Desember.
Merryl Herbert, ’n inwoner van Walvisbaai en ’n ekstra in die fliek, se baba het gesterf toe haar huis verlede week afgebrand het.
Die produksiespan het ’n sokkertoernooi gehou en die geld aan haar geskenk.