Mugabe opnuut gesig van Zanu in ’12-verkiesing
2011-12-10 23:13
- Artikelopsies
- Deel
- Kry Rapport op
Pres. Robert Mugabe staan volgende jaar weer as Zanu-PF se presidentskandidaat in Zimbabwe se verkiesing.
Dié seën wat sy party gister aan die einde van sy jaarlikse konferensie oor Mugabe uitgespreek het, herbevestig Mugabe as die leier van Zanu-PF en die gesig van die party se verkiesingsveldtog.
Intussen word bespiegel oor ’n moontlike opvolger vir Mugabe, onder wie mnr. Emmerson Mnangagwa, minister van verdediging, en adj.pres. Joice Mujuru.
Maar vir nou is Mugabe se leierskap onbetwis en sy begunstigdes sluit nie net diegene in hoë posisies in nie: Menige afgevaardigde by die konferensie het getuig hoe hulle voordeel uit die regering se grondbesettings getrek het.
“Die grondkwessie het my begunstig. Ek het nou ’n wildplaas en my ouers genoeg grond. So ek kla nie,” het mnr. Francis Nyathi, ’n professionele jagter uit die provinsie Lupane, aan die media gesê.
Die 21-jarige me. Happiness Nyoni, dogter van ’n oorlogsveteraan, sê: “Ek ondersteun Zanu-PF in navolging van my familie. Ek het ’n stuk grond waarop ek met varke boer.”
As jeugdienswerker kry sy ook ’n salaris van die regering.
Zimbabwe se plan dat sy burgers ’n aandeel in die land se minerale bronne kry, was hoog op die Zanu-PF-konferensie se besprekingslys.
Kragtens dié plan moet alle buitelandse maatskappye 51% van hul aandele vir dié doel afstaan.
Sommige mynhoofde en ekonome meen dis ’n verkiesingsfoefie, maar Mugabe het dié beskuldigings afgemaak as die uitlatings van mense met “geestesprobleme”.
Op die konferensie het hy geskimp volle eienaarskap is ’n moontlikheid. “Die fokus is op 51%. Maar dink jou in: 49% van ons diamante gaan steeds landuit. As ons ’n ware inheemse maatskappy het, sal niks die land verlaat nie.”
Mugabe het talle kere in sy toespraak geweld veroordeel, veral kort voor die verkiesing. Sommige waarnemers meen hy is bekommerd oor sy nalatenskap.
Maar buite die konferensiesaal sê mnr. Ashley Dzawo, ’n veiligheidsbeampte vir die Zimbabwiese lugdiens en ’n Zanu-PF-jeugleier in sy vrye tyd: “Waar ek ook al gaan, sal ek waaksaam wees. Ons weet die MDC-ouens is gewelddadig en as dit moet, sal ons terugslaan.”