Namakwalander in H'wood-fliek
2012-10-07 00:22
- Artikelopsies
- Deel
- Kry Rapport op
’n Seun van die Namakwaland gaan saam met die Hollywood-sterre Orlando Bloom en Forest Whitaker in ’n nuwe rolprent verskyn.
Shanville Brandt se akteursloopbaan het in sy matriekjaar begin toe hy in ’n Rapport-kompetisie ’n rol in die kykNET-sepie Villa Rosa losgeslaan het.
Nou gaan die loopbaan van dié 23-jarige akteur van Graafwater van krag tot krag.
Volgens Brandt mag hy nie veel van die storielyn verklap nie, behalwe dat hy ’n kroegman gaan speel. “Dis ’n fantastiese teks en ek kan nie wag om op stel te wees nie!”
Die fliek, Zulu, is gegrond op die bekroonde gelyknamige boek oor twee polisiemanne in post-apartheid-Suid-Afrika. Die regisseur is Jérôme Salle.
“In Mei het ek vir ’n oudisie gegaan, maar weer daarvan vergeet. Toe hoor ek nou ek het die rol gekry én dis teenoor Orlando Bloom en Forest Whitaker!”
Die verfilming het reeds in Kaapstad begin en Brandt is einde Oktober ’n week lank op stel.
“Ek kyk nou na al Bloom en Whitaker se vorige flieks om soveel moontlik van hulle te leer.”