Neil Armstrong sterf
2012-08-25 23:09
- Artikelopsies
- Deel
- Kry Rapport op
Neil Armstrong (82), die Amerikaanse ruimtevaarder wat die eerste mens was wat op die maan geloop het, is gister oorlede.
Sy gesin het in ’n verklaring gesê hy is weens komplikasies ná kardiovaskulêre behandeling dood.
Hulle het hom as ’n “teësinnige held” beskryf wat altyd gesê het dat hy “maar net sy werk gedoen het”.
Armstrong was 38 jaar oud toe hy op 20 Julie 1969 sy voete op die maanoppervlak gesit en een van die bekendste Engelse frases nóg geuiter het: “That’s one small step for (a) man, one giant leap for mankind”.
Armstrong is op 5 Augustus 1930 in die deelstaat Ohio gebore en was van kleins af gefassineer deur vliegtuie. Hy het in die Koreaanse oorlog 78 keer as vlootvlieënier aan gevegte deelgeneem. Ná die oorlog het hy ’n toetsvlieënier geword en die nuutste vliegtuie onder hande geneem, waaronder die X-15-vuurpylvliegtuig waarmee hy tot op die rand van die ruimte gevlieg het.
Hy het sy eerste ruimtevlug in 1966 onderneem. Ná jare van opleiding het die oomblik aangebreek: Op 16 Julie 1969 is Armstrong en sy vlugmaats, Buzz Aldrin en Mike Collins, van die Kennedy-ruimtesentrum maan toe gelanseer.
Ondanks sy kitsroem het Armstrong ’n nederige en uiters private mens gebly. Hy het Nasa verruil vir ’n pos aan die Universiteit van Cincinnati waar hy ingenieurswese aangebied het.
Altesame 24 ruimtevaarders het die maan van Desember 1968 tot Desember 1972 besoek, van wie 12 op die maan gestap het.