Obama, Romney raak nou bitsig
2012-08-04 23:43
Die Amerikaanse presidentsverkiesing lê nog meer as drie maande in die verskiet, maar die veldtog dreig nou al om aan albei kante een van die vuilste nog te word.
Van die grootse begeestering wat pres. Barack Obama vier jaar gelede onder soveel kiesers teweeggebring het, is min te sien.
Trouens, alles dui daarop dat Obama se Demokratiese Party besluit het op ’n negatiewe aanslag.
Tipies hiervan was ’n onderhoud wat sen. Harry Reid, leier van die Demokrate in die senaat, onlangs met die nuuswebwerf The Huffington Postgehad het.
Daarin het hy met ’n kronkeling van woorde te kenne gegee Obama se Republikeinse teenstander, die skatryk goew. Mitt Romney, betaal al tien jaar lank geen belasting nie.
Hy het dit glo by ’n (anonieme) belegger in Bain Capital, Romney se maatskappy, gehoor.
Sy woorde was slim: “Weet ek of dit waar is? Ek is nie seker nie, maar hy wil nie sy belastingaanslae openbaar maak nie.
“Watse indruk wek dit dan? U sê hy besit $250 miljoen. Ag wat, dis baie meer.”
Romney het inderdaad net sy belastingaanslae vir 2010 en 2011 openbaar gemaak. Daaruit blyk dit dat sy belastingkoers – binne die reëls – aansienlik laer is as dié van arm mense.
Romney het Reid se aantyging in ’n onderhoud ontken, maar wou ook nie sy belastingsake van voor 2010 bekend maak nie.
Sulke soort skimpe is nou deel van die Demokratiese aanslag teen Romney, wat geskets word as ’n obseen ryk miljoenêr wat niks vir arm mense omgee nie.
Obama het juis die afgelope week ’n bevinding van die Washingtonse Brookings-instituut dat Romney se plan vir belastingverligting van rykes die las op armes sal verswaar, aangegryp om sy teenstander as ongevoelig af te maak.
Die Republikeine staan nie terug nie. John Sununu, een van Romney se luitenante, het Obama daarvan beskuldig dat hy as tiener dagga gerook het. Hy het ook gesê die jare wat Obama as kind in Indonesië deurgebring het, maak dat hy Amerika nie verstaan nie.
In TV-advertensies word ook weer twyfel gesaai oor die vraag of Obama ’n geheime Moslem is en of hy op Amerikaanse grondgebied gebore is. As dit nie die geval is nie, mag hy ingevolge die Amerikaanse grondwet nie president wees nie.
Dat Obama Christelik opgevoed is en dat sy geboortesertifikaat wys hy is in Hawaii – een van die 50 state van Amerika – gebore, skrik die Republikeine nie af nie. Hulle skilder hom as ’n gevaarlike sosialis wat die land aan enige denkbare vyand wil oorgee.
Peilings wys Obama loop tans naelskraap voor met 47% teenoor 45%. Bowendien meen die meeste kiesers in minstens drie deelstate wat die deurslag kan gee, Pennsilvanië, Ohio en Florida, dat Obama meer vir hulle omgee as Romney.
Altesame 60% van die kiesers landwyd meen Obama is “eerlik en betroubaar”, teenoor 50% wat Romney só sien. Romney kan ook benadeel word deur sy lomp reaksies op situasies waarop hy nie voorbereid is nie.