Ontvoerde tree vir tree op herstelpad
2010-03-06 23:08
“Dis ’n lang pad wat ek loop, maar ek is besig om aan die ander kant uit te kom.”
So het Jaycee Lee Dugard (29), die jong Amerikaanse vrou wat byna twee dekades lank as ’n seksslaaf in ’n veroordeelde seksoortreder se agterplaas aangehou is, gesê in ’n nuwe tuisvideo wat Vrydag uitgereik is.
Dié video, wat eksklusief aan ABC News in Amerika beskikbaar gestel is, wys hoe Dugard tuis saam met haar ma, Terry Probyn, koekies bak en met haar honde speel.
Jaycee en haar twee dogters leef in afsondering saam met Probyn.
In die video sê sy: “Hallo, ek is Jaycee. Ek wil julle bedank vir jul ondersteuning. Dit gaan goed.”
Dis Dugard se eerste openbare aankondiging sedert haar vermeende ontvoerders, Philip Garrido (58) en sy vrou, Nancy (54), in Augustus verlede jaar in hegtenis geneem is.
Hulle is op 29 klagte van onder meer ontvoering en verkragting aangekla.
Dugard is gered nadat sy 18 jaar gelede as 11-jarige binne loopafstand van haar huis in South Lake Tahoe, Kalifornië, verdwyn het.
Nancy het Garrido bygestaan toe hy Dugard in tente in die agterplaas by hul huis in Antioch, Kalifornië, versteek het.
Die Garrido’s se huis is ongeveer 180 km van Jaycee se ouerhuis.
Nancy het ook gehelp om dit geheim te hou dat haar man twee kinders – wat nou onderskeidelik 15 en 11 jaar oud is – by Dugard verwek het.
Luidens berigte in die Amerikaanse media het Dugard laat blyk sy het nou genoeg selfvertroue om die wêreld in die oë te kyk.
“Ons het dié video uitgereik sodat julle kan sien ons is gelukkig en dit gaan goed met Jaycee en haar dogters,” sê Probyn in die video.
“Maar as haar ma pleit ek vir ons privaatheid in hierdie baie openbare storie.”
Owerhede hou vol dat Dugard nie met Garrido of sy regsverteenwoordigers wil praat nie.
Hulle probeer alles moontlik om haar en haar ouers se verblyfplek geheim te hou.
Luidens berigte het die twee tieners egter laat blyk hulle mis hul pa. Hulle was glo baie geheg aan hom, en is ontsteld daaroor dat hy in die tronk is.
Volgens Dugard se stiefpa, mnr. Carl Probyn, “het die meisies hulle vyf as ’n gesin beskou; hul ma as hul suster”.
“Hulle het gehuil toe hul pa in hegtenis geneem is. Hulle het nooit besef hul ma was ’n gevangene nie.”
Dit het ook nou aan die lig gekom dat Garrido sy lyf prediker gehou het en gereeld godsdienstige pamflette uitgedeel het.