Ook Britte sien prins nou kaal in koerant
2012-08-25 23:19
- Artikelopsies
- Deel
- Kry Rapport op
Die herrie in Brittanje oor die kaalfoto’s van prins Harry is nog lank nie verby nie.
Waar die Britse media eers op eiers geloop het deur nie die foto’s te publiseer nie nadat die res van die wêreld dit vrylik op die internet kon bekom, het The Sun Vrydag wel op publikasie besluit.
Dié stap kan die koerant dalk voor die Britse persklagteraad (PCC) laat beland.
Harry het met 25 vriende in ’n private suite in ’n hotel in Las Vegas in die VSA gekuier. Hy en sy gevolg het ’n paar jong vroue in die hotel se kroeg oortuig om by hul partytjie aan te sluit.
Bo in die suite het dinge rof geraak toe hulle strip pool gespeel het.
Harry was glo die eerste wat van sy klere laat waai het.
Een van die vroue het toe foto’s geneem wat sy glo later aan die Hollywood-webwerf TMZ verkoop het. Twee foto’s is gepubliseer van waar Harry poedelnaak staan en sy kroonjuwele vasklou terwyl ’n jong ongeïdentifiseerde vrou agter hom staan.
’n Tweede foto wys hoe die jeugdige prins kaalboud staan en ’n jong vrou vashou. Weens die swak gehalte van die foto’s is dit onbekend of dit dieselfde vrou is.
Die Buckingham-paleis het erken dit is Harry op die foto’s en die Britse pers versoek om sy privaatheid te respekteer deur nie die foto’s te publiseer nie.
The Sun het aanvanklik op ’n gemanipuleerde foto die gesig van ’n manlike model gepubliseer. Maar Vrydag het die koerant van plan verander en in ’n lang redaksionele skrywe gesê die wêreld het al die foto’s gesien en dit is in die publiek se belang om dit onder oë te kry.
Die koerant het toe onder die opskrif “Heir it is” die regte foto’s gepubliseer.
Sowat 850 klagtes teen The Sun se besluit is by die PCC aanhangig gemaak.
The Sun het sowat R210 000 vir die foto’s betaal.
Die bekende Britse beeldpoetser Max Clifford het aan The Washington Post gesê hy is deur twee vroue genader wat nóg foto’s van die partytjie aan hom wou verkoop. Hy het die aanbod van die hand gewys. Clifford reël stories vir die Britse media.
’n Bron na aan die koningshuis het gister uit Londen aan Rapport gesê die prins het ’n begeerte om “’n normale kind” te wees.
“Hy vergeet hy is ’n bekende koninklike lid. Hy wil aanvaar word as ’n doodgewone ou. En as hy nie op sy hoede is nie, gebeur hierdie soort goed soos die foto’s,” het sy gesê.
“Prins Philip (Harry se oupa) lag net oor die aangeleentheid, en Richard Branson is baie ondersteunend teenoor die prins.”
(Bykomende bronne: The Washington Post, The Sun)