Ou knol teen Kate
2013-02-23 23:05
“Bump 1, Grump 0.”
Só het die Britse poniekoerant The Sun Woensdag in ’n opskrif die uitkoms beskryf van ’n “geveg” tussen ’n bekroonde skrywer en Brittanje se liefling, Catherine, die hertogin van Cambridge.
Kate, wat verwagtend is (daarom die “Bump”) is deur die “suurknol” Hilary Mantel (“Grump”) beskryf as ’n winkelpop sonder enige persoonlikheid.
Mantel (60), wat die gesogte Man Booker-prys al twee keer gewen het met werke wat afspeel in die era van Henry VIII, het Catherine tydens ’n lesing in Londen bygekom.
Dié swaargewigskrywer het Kate beskryf as “pynlik maer” en “met vernis afgewerk”.
Mantel het ook gesê Kate is “deur ’n komitee ontwerp en deur ambagslui gemaak, met ’n perfekte plastiekglimlag”.
Dié Mantel-kritiek het ’n mediastorm veroorsaak. Daily Mail het in ’n voorbladberig uitgevaar teen dié “verstommende en giftige aanval”.
Dié koerant, wat erg koningsgesind is, het Mantel ook goed in ’n snydende spotprent bygekom.
En die ewe koningsgesinde The Sun het triomfantelik berig dat Kate, wat op grond van protokol nie kon reageer nie, daarna op die bes moontlike manier “teruggeslaan” het.
Volgens The Sun het sy dít gedoen deur pragtig en elegant te lyk op haar eerste openbare verskyning kort daarna. Haar swanger bump was boonop by dié geleentheid by Hope House in Londen, waar sy vroue ontmoet het wat van alkohol- en dwelmverslawing herstel, vir die eerste keer sigbaar.
Ook David Cameron, die Britse premier, het tot Kate se verdediging gekom. Mantel is ’n uitstekende skrywer, maar was “heeltemal verkeerd” met haar kritiek, het hy gesê.
“By openbare geleenthede soos die Olimpiese Spele het ek prinses Kate ervaar as slim en aangenaam, iemand wat ’n fantastiese ambassadeur vir Brittanje is,” het Cameron gesê. – Korrespondent, Londen