Paris leer ook nie
2010-08-28 23:53
- Artikelopsies
- Deel
- Kry Rapport op
Las Vegas. – En daar doen Paris Hilton dit wraggies weer!
Die Amerikaanse sosiale vlinder is laat Vrydagaand vir die onwettige besit van kokaïen in hegtenis geneem, nadat die voertuig waarin sy was, afgetrek is.
Mnr. Marcus Martin, ’n polisiewoordvoerder, het gesê Hilton is gisteroggend in die Clark County Detention Center aangehou op ’n klag van die onwettige besit van kokaïen.
Hilton was in ’n voertuig wat deur ’n vriend bestuur is. Beamptes het die voertuig afgetrek nadat hulle ’n daggadampie uit die voertuig sien kom het. Die polisie het ’n middel in Hilton se besit gevind, wat later as kokaïen getoets is.
Martin het gesê hy weet nie hoeveel kokaïen gevind is nie.
Die polisie het gesê sy sou waarskynlik gistermiddag op ’n skulderkenningsboete weer vrygelaat word.
Dié nuwe drama kom net weke nadat sy in Frankryk én Suid-Afrika met dwelms betrap is.
In Julie is Hilton op die Franse eiland Korsika, digby die Italiaanse kus, in hegtenis geneem en aangehou nadat die polisie minder as ’n gram dagga in haar ontwerpershandsakkie gevind het.
Omdat die hoeveelheid dagga so min was, is sy egter nie aangekla nie en binne ’n halfuur weer vrygelaat.
Dít volg nadat sy op 2 Julie ná ’n Wêreldbeker-sokkerwedstryd tussen Brasilië en Nederland in Port Elizabeth saam met haar vriendin Jennifer Rovero vir die besit van dagga in hegtenis geneem is.
Rovero, ’n gewese Playboy Playmate, het skuld erken en is ’n boete van R1 000 of 30 dae tronkstraf opgelê. Die klag teen Hilton is toe laat vaar.
- Rapport