Proesel van ‘Elysium’ gewys
2012-07-15 00:01
- Artikelopsies
- Deel
- Kry Rapport op
Nadia Neophytou in San Diego
In 2009 het liefhebbers van wetenskapfiksie by ’n beraad in Kalifornië vir die eerste keer ’n klein aksierolprent met onbekende akteurs te sien gekry wat in Johannesburg afspeel.
’n Jaar later het District 9 sy regisseur, die Suid-Afrikaner Neill Blomkamp, ’n superster gemaak en vier Oscar-benoemings losgeslaan.
Blomkamp het Vrydagaand sy jongste poging op Comic-Con, die wêreld se grootste beraad oor strokiesprente en populêre kultuur, onthul. Dit is die eerste keer wat ’n uittreksel uit sy rolprent Elysium vertoon is.
Matt Damon, Jodie Foster en Sharlto Copley is in die hoofrolle.
Sowat 100 000 wetenskapfiksie- en strokiesprent-aanhangers trek jaarliks saam by Comic-Con.
Volgens Blomkamp het hy sewe minute van Elysium op Comic-Con kom wys om dié mense te bedank vir hul steun aan sy vorige fliek.
Copley, wat ook die hoofrol in District 9 vertolk het, het gesê 2009 se Comic-Con was bepalend vir sy loopbaan. Sedertdien het hy in The A-Team gespeel en tans werk hy in Londen aan Malevolent saam met Angelina Jolie.
“Ek moet myself nou nog knyp. Ek speel Angelina Jolie se liefde!” borrel hy.
“My skoolvriende weier om dit te glo.”
Copley hoop Elysium, wat vroeg volgende jaar uitgereik word, sal bewys District 9 “was nie net ’n gelukskoot nie”.
Elysium speel af in die toekoms, waar die wêreld só uitgebuit is dat die rykes geëmigreer het na ’n planeet waar armoede nie bestaan nie.
Volgens Damon was dit nie ’n moeilike besluit om die hoofrol in die rolprent te speel nie. Nadat hy District 9 gesien het, het hy geweet hy móét saam met Blomkamp werk.
In Elysium speel hy een van die armes op aarde wat ’n ruimtetuig kaap en na die rykes se planeet reis.