Romney klop Obama in debat

DEN HAAG. – Goew. Mitt Romney is terug in die Amerikaanse presidentsverkiesing. Hy het duidelik die eerste televisiedebat met pres. Barack Obama gewen, is die oorweldigende konsensus van onafhanklike waarnemers.

Romney het oorgeloop van selfvertroue en het aggressief onder die president se vertoning van die afgelope vier jaar ingeklim.

Hy het Obama kwaai gekapittel omdat Obama toegelaat het dat die Amerikaanse staat-skuld ongekende hoogtes bereik het en oor die groeiende werkloosheid en die gebrek aan leiding oor hoe om uit die ekonomiese krisis te kom.

Obama, so stem kenners saam, was nie naastenby die man wat mense vier jaar gelede byna tot raserny kon dryf met sy meeslepende retoriek nie. Hy het ietwat onseker voorgekom, dikwels in sy notas gekyk en die indruk gelaat dat hy die materiaal nie so goed soos Romney beheer nie.

Bowendien was sy antwoorde soms langdradig teenoor die kort en kragtige antwoorde van sy teenstander. Af en toe het hy geïrriteerd en selfs neerbuigend oorgekom.

Daarby het hy Romney met moord laat wegkom. Hy het nie een keer verwys na Romney se flater-uitspraak dat die 47% van die kiesers wat vir die president stem, basies parasiete is nie. Ook Romney se verlede by die maatskappy Bain Capital, waardeur duisende mense hul werk verloor het, is nie gebruik nie.

Dit is vreemd, want die Demokrate se televisie-advertensies hieroor werk baie goed. Een teorie van waarnemers is dat Obama “presidensieel” wou oorkom. Maar as dit die geval was, het dit nie gewerk nie.

Die kykers het ook saamgestem dat Romney Obama kafgedraf het. In ’n peiling van CNN het 67% teenoor 25% gemeen hy het gewen, terwyl ’n CBS-peiling onder onbesliste kiesers gewys het dat 46% teenoor 22% Romney as wenner aangewys het.

Die groot vraag is of dit die kiesersgedrag op stemdag beduidend gaan beïnvloed. Volgens ’n peiling van NBC, die Wall Street Journal en Marist College het Romney sy teenstander se effense voorsprong in minstens twee wipplank-state, Florida en Virginië, verder verklein, hoewel hy in ’n derde, Ohio, steeds beduidend voorloop.

Nasionaal het Romney ook nader aan Obama gekruip. In ’n NBC-peiling het hy ná die debat met 46% teenoor 49% agter geloop, vergeleke met die 45% teenoor 50% voor die debat.

Prof. Tom Holbrook, ’n politikoloog aan die Universiteit van Wisconsin, het egter aan Reutersgesê televisiedebatte het sedert 1988 nooit tot ’n swaai van meer as 1 persentasiepunt gelei nie.

- Volksblad