Saluta continua vir Dirty Harry
2012-09-01 23:02
Sy kaalbaskaperjolle in Las Vegas het prins Harry wel in ’n groot verleentheid gestel, maar derduisende Britte tree nou so kaal moontlik aan om hul “stoute” prins met ’n saluut te ondersteun.
Die Facebook-blad van sy steungroep – “Support Prince Harry with a Naked Salute!” – word behoorlik oorstroom met foto’s van lede wat in skrapse kleertjies of byna naak vir hul saluut aan Harry poseer.
Selfs weermaglede, met hul vroue en kinders, betoon hier aan hul prins hul naakte steun.
Dit was juis twee weermaglede, Lee Kirton en Jordan Wylie, wat dié Facebook-blad begin het nadat foto’s van die prins se kaal manewales twee weke gelede in die Britse poniekoerant The Sun verskyn het.
Wylie het gesê hy is verstom oor hoeveel aandag die Facebook-blad lok.
Binne vyf dae het die Facebook-blad meer as 26 000 ondersteuners getrek, met nog 25 000 wat wag om aanvaar te word.
Kaalbasfoto’s van die prins is twee weke gelede in ’n private hotelsuite in Las Vegas geneem.
Harry het hier saam met 25 vriende en ’n paar jong vroue partytjie gehou en later ontklee-biljart gespeel waar Harry glo heel eerste sy klere verloor het.
Dis onduidelik of Harry en sy meisie, Cressida Bonas, nog saam is. Volgens sommige berigte was die vernedering van die foto’s te erg vir haar, maar volgens ander bronne besluit sy nog oor die toekoms.
Bronne: Associated Press, The Telegraph, The Daily Mail, Mirror News