Sandy lei dalk weer tot chaos

Net 48 uur.

Dít is al tyd wat oor is in een van die taaiste presidentsverkiesings in Amerika.

Pres. Barack Obama en oudgoew. Mitt Romney, sy teenstander, sal spook om die verlore tyd in te haal wat die superstorm Sandy hulle die afgelope week gekos het.

Elkeen van die 270 setels sal tot in die pylvak gejaag word.

Sandy kan dalk die 2012-uitslag weer soos 12 jaar gelede in ’n donker wolk van problematiese tegnologie hul.

In 2000 is duisende stemme in die belangrike deelstaat Florida nie getel nie en kundiges het gister kommer uitgespreek dat dieselfde Dinsdag kan gebeur.

Dieselfde masjinerie as destyds word steeds gebruik en boonop vererger Sandy se verwoesting die onsekerheid, het Thad Hall, ’n politieke navorser van Utah, gesê.

“Geen krag beteken masjinerie sal net werk solank hul batterye hou.

“Dit beteken ook skandeerders sal nie gebruik kan word om foute op stembriewe uit te lig nie.”

Weens die verwoesting sal sommige kiesers nie kan gaan stem nie omdat hulle ver is van hul plaaslike stemlokaal ná die afgelope week se ontruimings.

Ses miljoen huise en ondernemings was gister nog sonder krag en verskeie gemeenskappe langs die ooskus was onder water of afgesny ná die storm wat die lewe van minstens 85 mense geëis het.

* In Suid-Afrika kan belangstellendes van Woensdag 02:00 af begin uitkyk vir die eerste uitslae.
– AFP, AP