Skote eis 27: 'Maar hoeveel keer nog?'
2012-12-16 00:57
- Artikelopsies
- Deel
- Kry Rapport op
Weer en weer storm jong mans, dikwels met ’n geskiedenis van gemoedsversteurings, gewapen by skole en universiteite in en maai niksvermoedende leerlinge soos diere af.
Nadat dit eergister vir die soveelste keer in Amerika gebeur het, dié keer in die dorpie Newtown in New York se buurstaat Connecticut, en nadat ’n geskokte nasie gehoor het 20 van die slagoffers was tussen vyf en tien jaar oud, begin dit lyk of die debat oor wapenbesit in Amerika ’n nuwe rigting kan inslaan.
Pres. Barack Obama het trane weggevee toe hy op ’n mediakonferensie gesê het: “Ons het al te veel van dié tragedies beleef. Ons is al te dikwels hierdeur. Ons sal betekenisvolle stappe moet doen om sulke tragedies te voorkom, ongeag die politiek.”
Adam Lanza (20) het Vrydag omstreeks 09:00 die klokkie gelui by die Sandy Hook-laerskool in Newtown nadat hy sy ma, Nancy, ’n onderwyseres by die skool, tuis doodgeskiet het.
Die skoolhoof, Dawn Hochsprung, het hom herken en ingelaat, berig The New York Times.
Nadat hy die skoolhoof doodgeskiet het, het hy in twee klaskamers 20 kinders en vyf volwassenes doodgeskiet en toe homself.
Onderwysers van dié skool met 700 leerlinge het klaskamerdeure gesluit en histeriese kinders in kaste laat wegkruip.
Lanza se broer, Ryan (24), is aanvanklik verkeerdelik as die skieter uitgewys.
Ryan is deur die polisie ondervra en het gesê sy broer het ’n persoonlikheidsversteuring gehad.
Onmiddellik ná die skietery het aktiviste gevra waarom so min oor wapenbeheer gedoen is sedert 2007 toe Cho Seung-hui 32 mense by Virginia Tech in Blacksburg, Virginië, doodgeskiet het voordat hy selfmoord gepleeg het.
Pogings deur die deelstate Washington DC en Chicago om handwapens te verbied, is boonop intussen deur die hooggeregshof gekelder.
Betogers het voor die Withuis saamgedrom en op die internet is ’n versoekskrif begin wat vra dat Obama se regering wapenbeheer verskerp en ’n nasionale debat begin.
Drukgroepe soos die National Rifle Association (NRA), wat teen streng wapenbeheer veg, het deurgeloop onder kritiek.
“Hierdie is ’n kollektiewe versoek om die maniere waarop vuurwapens bekom kan word, te reguleer,” lui die versoekskrif.
Bronne: www.nytimes.com; www.washingtonpost.com; www.dailymail.co.uk