Skrapse Candice te warm
2012-09-09 01:16
Christine van de Westhuizen
Candice Swanepoel is welbekend vir haar bates soos haar bos goue hare, seeblou oë en daardie la-a-ang bruin bene.
Maar in die jongste advertensie waarin dié Suid-Afrikaanse supermodel verskyn, sien mens net haar enkels.
Dít nadat die oorspronklike witwarm-advertensie as te gewaagd beskou is.
In daardie weergawe het sy meer skoene aan as klere en verskyn met ’n paar gespierde mans – wat nie eens skoene aan het nie.
Die advertensie vir die skoenontwerper Brian Atwood sou voor Atwood se nuwe winkel in New York verskyn. Maar dis verbied en vervang met ’n foto waarin net Swanepoel se enkels te siene is bo die skoene wat sy dra.
Nog ’n Swanepoel-advertensie wat in New York se taxi’s vir passasiers vertoon sou word, is verbied, ook weens die tekort aan kleredrag (skoene uitgesluit).
Dié advertensie is wel in die September-uitgawes van glanstydskrifte soos Vogue en W te sien. En natuurlik op die internet, waar dit klaar deur duisende mense, wat nooit voorheen in skoenadvertensies belang gestel het nie, gesien is.
Atwood sê hy begryp nie waaroor die bohaai gaan nie, want die advertensie is bloot “’n pragtige meisie in pragtige skoene”.
“As mense dink dít is pornografies het hulle duidelik nie onlangs pornografie gekyk nie,” het hy aan The New York Post gesê.
Swanepoel het aan Sky News gesê hoewel sy heeltemal gemaklik is met hoe sy in die advertensieveldtog uitgebeeld word, kan sy verstaan waarom dit verbied is. “Nie almal is gemaklik met hul eie seksualiteit nie, maar vir my is dit nie ’n probleem nie.”