Só lyk Heidi sonder hulp
2012-11-03 23:51
Die supermodel Heidi Klum het die maskara en lipstiffie laat waai en met ’n skoon gesig poseer vir ’n nuwe Britse veldtog vir behoeftige kinders.
Klum (39), die ma van vier kinders, is byna onherkenbaar in die BBC se Kinders in Nood-veldtog.
Intussen help Klum se Suid-Afrikaanse lyfwag haar om haar wonde te lek tydens haar egskeiding van die sanger Seal.
Klum het onlangs aangekondig sy en haar lyfwag, die Suid-Afrikaans gebore Martin Kristen, is in ’n verhouding.
Sy het Seal in April ná ’n huwelik van sewe jaar om ’n egskeiding gedagvaar. Die egpaar het drie kinders.
Sy het ook ’n dogter uit ’n vorige huwelik.
Klum was blykbaar nie baie beïndruk deur haar nuwe kêrel se klerekas nie en is verlede week afgeneem waar sy op ’n inkopietog sowat R70 000 aan klere vir hom uitgegee het.
Dit lyk nie of die Kiss From a Rose-sanger baie ingenome is met dié nuwe romanse nie.
Nadat hy van die verhouding verneem het, het ’n verbitterde Seal gesê Klum “koer-koer met die hulppersoneel”.
* Britse rubriekskrywers het dié veldtog as belaglik bestempel en dit uitmekaargetrek. “Kyk na my, ek is beeldskoon sonder grimering,” het Jan Moir gister in Daily Mail geskryf. Wat die deelnemers eintlik daarmee sê, volgens Moir, is: “Boonop is ek ook ’n goeie mens. Ek is beter as jy.” – Daily Mail
"Kaalgesig" Heidi Klum.