Sportlui gaan vir goud in die kooi
2012-07-21 20:59
Een groot partytjie, met net soveel sport(s) tussen die lakens as wat daar sport is.
Dís glo hoe dit agter die skerms gaan by die wêreld se grootste sportgebeurtenis volgens ’n nuwe boek, The Secret Olympian: The Inside Story of the Olympic Experience.
Een van die sappige aansprake in die boek is dat 70 000 kondome binne ’n week deur die sportlui opgeraap is tydens die Olimpiese Spele in Sydney 12 jaar gelede.
Die boek het ’n anonieme skrywer en volgens gerugte is hy ’n voormalige Britse atleet.
Sy onthullings strek van die 1960-Spele in Rome tot by die Spele in Londen wat binnekort begin en waaraan verteenwoordigers van 205 lande sal deelneem.
Die skrywer vertel hoe poetse gebak word by die voor-Olimpiese kamp, politici se besoeke met wulpse metgeselle aan die arms en die partytjies in die Olimpiese dorpies met ’n oormaat drank, kos en seks.
Hy vertel ook hoe deelnemers na afloop van die Spele weer by die “gewone lewe” moet aanpas.
Dit is geen geheim nie dat die alkohol vryelik vloei. In Londen het net die Amerikaanse span twee biersale wat deur onderskeidelik Budweiser en Heineken geborg word.
En waar daar alkohol en jong, fikse, aantreklike mans en vroue is, is daar ook seks.
100 000 kondome is vir deelnemers by vanjaar se Spele begroot.
Meer as een deelnemer het ook al gesê die swemmers is “die opwindendste partytjiediere”.
By die vroue is dit blykbaar die kortafstand-atlete wat vinnig uit die blokke is om telefoonnommers en kamersleutels bymekaar te maak.
Dr. Ross Tucker, ’n sportwetenskaplike aan die Universiteit van Kaapstad, sê hy byt langtand aan die storie van die 70?000 kondome in Sydney.
“’n Atleet wat by die 2000-Spele was, het onlangs in ’n onderhoud erken die deelnemers wou die draak steek met die organiseerders. Hulle het by elke geleentheid waar hulle kon kondome bymekaar gemaak en só die organiseerders laat wonder wat regtig aangaan as die ligte afgaan.”
Tucker sê dit maak heeltemal sin dat die deelnemers sal ontlaai wanneer hulle klaar deelgeneem het.
“Sportlui van daardie kaliber offer geweldig baie op om aan die Olimpiese Spele deel te neem. Dit verg jare se intensiewe oefening. As hulle klaar deelgeneem het, wend hulle daardie selfde intensiteit elders aan.
“So, as hulle partytjie hou, sal hulle hard partytjie hou. Vat op daardie oomblik die sport weg en hulle fokus op iets anders, dikwels drank en seks.”