Sy keelaf-lyk vir krokodille gevoer

2012-07-16 06:47

Estie en Marius Pienaar op hul troudag in Augustus verlede jaar. Estie is die afgelope week saam met twee ander beskuldigdes aangekeer weens die moord op Marius, ’n Suid-Afrikaner wat die afgelope ses jaar in Zambië woon.

Lesersfoto’s Stuur vir ons jou foto's  ·  Stuur vir ons jou foto's

Die Suid-Afrikaner wat net meer as twee weke gelede in Zambië vermoor is, was vasgevang in ’n liefdesdriehoek en is ná sy fyn beplande moord “vir die krokodille gevoer”.

Die Zambiese polisie het die afgelope week aan Rapport gesê Marius Pienaar (50) is vermoedelik in sy slaap met ’n stomp voorwerp oor die kop geslaan én sy keel is afgesny voordat sy lyk in die Zambezirivier gegooi is in die hoop dat krokodille dit sou opvreet.

Daarna het sy moordenaars glo sy skoene op die rivieroewer en sy visstok in die water “geplant” om dit te laat lyk of ’n krokodil hom gevang het.

Sy vrou, Estie (33), asook Nicky Rossouw (58) en Mulumbwa Nyambe (30), is die afgelope week gearresteer in verband met dié moord. Rossouw is die eienaar van die Nina-hengelkamp net buite Sesheke in die westelike provinsie van dié land waar die Pienaar-egpaar vakansie gehou het. Nyambe is een van sy werkers.

“Die vrou en die eienaar het albei aan die polisie erken dat hulle ’n liefdesverhouding het en dat hy (Rossouw) met haar wou trou.

“Hulle ontken egter enige betrokkenheid by Pienaar se moord,” het komm. Fanwell Siandenge, ’n polisiewoordvoerder, aan Rapport gesê.

“Hulle het al drie Dinsdag in die hof in Sesheke verskyn en word daar in ’n tronk aangehou.

“Hulle sal weer op 25 Julie verskyn.”

Marius, ’n myntegnikus van Phalaborwa wat ses jaar gelede na Zambië verhuis het, het op 26 Junie raaiselagtig uit dié kamp verdwyn.

Sy lyk is vyf dae later, ná ’n grootskaalse soektog, in die rivier gevind.

“Ons het eers die verdagtes se storie geglo dat hy deur ’n krokodil gevang is, maar toe ons die lykskouingsverslag en die oorsaak van sy dood sien, het ons besef wat regtig gebeur het,” het Siandenge gesê.

“Die oorledene is met ’n stomp voorwerp oor die kop geslaan én sy keel is afgesny – vermoedelik terwyl hy gelê en slaap het.

“Ons het bloedspatsels op die planke van sy bed gevind en dis reeds weggestuur vir toetse na ’n hospitaal in ­Lu­saka.”

Volgens Siandenge was nét die Pienaars, Rossouw en Nyambe die aand van die moord in die kamp.

“?’n Ander werker is omstreeks 20:00 huis toe, maar hy het gesien hoe dié vier saamkuier.

“Hy is die volgende oggend terug kamp toe, maar die oorledene was weg.

“Niemand het in daardie stadium na hom gesoek nie,” het Siandenge gesê.

“Dié werker het sy skoene op die oewer van die rivier gevind, waarna die polisie ontbied is.”

Marius se visstok is ’n ruk later in die rivier gevind.

“Ons glo die moord was fyn beplan en dat die skoene en die visstok geplant is om dit te laat lyk asof hy deur ’n krokodil gegryp is,” het Siandenge gesê.

“Sy moordenaars het egter sy lyk vir die krokodille gevoer in die hoop dat dit nooit gevind sou word nie.

“Ongelukkig vir hulle het dit uitgespoel en was daar geen bytmerke daaraan nie.”

Volgens hom is familielede van ­Marius reeds in Lusaka om sy oorskot terug te bring na Suid-Afrika.

;?Nelson Kgwete, ’n woordvoerder van die departement van internasionale betrekkinge en samewerking, het aan Rapport bevestig die beskuldigdes sal in Zambië verhoor word en nie aan Suid-Afrika uitgelewer word nie.

Die doodstraf kan steeds in Zambië opgelê word weens moord, hoewel dit laas in Januarie 1997 voltrek is toe agt mense tereggestel is.

Pienaar aan 'n vriendin voor sy troue: ‘My lewe begin môre’


Marius Pienaar het die aand voor sy troue met Estie in Augustus verlede jaar aan sy boesemvriendin gesê sy ­lewe “begin môre”.

Vandag, byna ’n maand voor hul eerste huweliksherdenking, staan dié voormalige toeroperateur van Ruimsig in Johannesburg, haar beweerde minnaar en ’n 30-jarige Zambiër in dié land tereg op Marius se gru-moord.

Estie, Nicky Rossouw en Mulumbwa Nyambe het Dinsdag in ’n hof in Sesheke verskyn nadat Marius se lyk vroeër in die Zambezirivier gevind is.

“Marius was ’n wonderlike man.

“Hy het oorgeloop van die goedheid en hy is die laaste mens wat só moes sterf,” het dié vriendin, wat verkies om anoniem te bly, aan Rapport gesê.

“Hy was destyds só opgewonde oor die troue en het my nog die vorige aand gekontak om te sê sy lewe begin môre.”

Volgens haar het Marius en Estie ’n paar jaar gelede in Livingstone ontmoet en is hulle op 19 Augustus verlede jaar in Honeydew getroud.

Marius, wat voorheen vir die Palabora Mining Company in Phalaborwa gewerk het, het in 2006 na Zambië verhuis waar hy ’n senior tegnikus was by die Kanshansi-kopermyn in Solwezi.

“Ek het ’n dag of twee voor sy dood met hom gepraat en daar was geen sprake van enige probleme tussen hom en Estie nie. Hy het hook, line en sinker vir haar geval,” het die vrou gesê.

“Estie en Nicky ken mekaar al lank en sy het vir Marius aan hom voorgestel. Hulle het gereeld by Nina gaan visvang en daar oorgeslaap.

“Sy en Nicky is duidelik naby aan mekaar en skryf gereeld vir mekaar boodskappe op Facebook – selfs ná Marius se dood.”

Rossouw het die Zambiese polisie vroeër self gehelp soek na Marius en het gereeld foto’s en boodskappe oor hul vordering op sy Facebook-blad geplaas.

Op 1 Julie, die dag wat Marius se lyk gekry is, het Estie op een van dié boodskappe geskryf: “Duisende dankies vir jou Nicky en almal xxx.”

'Nicky het nag en dag na sy groot pel gesoek'

Nicky Rossouw het “snot en trane” gehuil toe Marius Pienaar vermis geraak het en het hárder as die polisie na “sy groot pel” gesoek.

So sê ’n vriendin van dié 58-jarige Namibiër, wat die afgelope week saam met Pienaar se vrou, Estie, en Mulumbwa Nyambe, ’n werker van die Nina-hengelkamp, aangekeer is in verband met die moord op Marius.

“Ek ken Nicky al meer as tien jaar lank en ek en my man hou gereeld by hom vakansie,” het dié vrou, wat anoniem wil bly, aan Rapport gesê.

“Hy is nie daartoe in staat om iemand leed aan te doen nie en ek weet niks van enige verhouding tussen hom en Estie nie. Hy het dan snot en trane gehuil toe hy my bel om te sê sy groot pel word vermis.”

Volgens haar het Rossouw nooit geglo ’n krokodil het Marius gevang terwyl hy gehengel het nie.

“Hy het ’n foonoproep gaan maak en toe hy terugkom, was Marius weg.

“Hy het vir die polisie bly sê dit kon nie ’n krokodil gewees het nie, want hy het gesóék, maar kon net twee kleintjies kry.”

Die eksvrou en seun van Rossouw, wat 12 jaar gelede van Namibië na Zambië verhuis het om Nina te begin, het intussen na dié land gevlieg.

Hy was voorheen ’n paneelklopper en het ’n insleeponderneming besit.

“Hulle is rasend van bekommernis, maar sê dit gaan goed met hom in die tronk,” het die vriendin gesê.

“Hulle het reeds ’n advokaat van Lu­saka aangestel en hy meen daar is geen bewyse dat Nicky betrokke was nie. Hy het ook aangedring op ’n tweede lykskouing.”

Volgens haar het Rossouw “dag en nag” gesoek na Marius.

“Die polisie in Zambië het nie voertuie of petrol nie en Nicky het alles self gereël en betaal,” het sy gesê.

“Hy het alleen aangehou soek, selfs toe die polisie en die myn (vir wie Ma­rius in Zambië gewerk het) al opgehou het.”





Lees Rapport se kommentaarbeleid

Lewer kommentaar op hierdie artikel
7 reaksies
Lewer kommentaar
Kommentaar 0 oorblywende karakters

binne rapport

Weer
Ksd: 12-15°C Numerous showers. Afternoon clouds. Cool. Pta: 3-24°C Sunny. Mild.
Jhb: 7-18°C Sunny. Mild. Bfn: 5-22°C Sunny. Mild.
Dbn: 10-27°C Sunny. Warm. PE: 10-22°C More sun than clouds. Mild.
7-dag-voorspelling...

Betrekkinge - Vind jou droomwerk

Clearing and Forwarding Sales Executive

Cape Town CBD
Communicate Durban Freight

Senior Financial Accountant

East Rand
Network Finance Corporate
R600 000 - R700 000 Per Year

Senior Financial Analyst

Sandton
Communicate Midrand Finance
R700 000 - R750 000 Per Month

Eiendomme - Vind 'n nuwe huis

Reis - Besoek, Bespreek, Laat Waai!

Magical Massinga

Spend 5 nights at the gorgeous Massinga Beach Lodge in Mozambique and only pay for 4 from R13 220 per person sharing. Includes return flights, accommodation, transfers and romantic turndown.Book now!

Kalahari.com - doen vandag jou inkopies aanlyn

Tablet Asus Nexus 7'' 3G met 32GB nou R1 999

Kry die Nexus 7”-tablet met Wifi & 3G vir slegs R1 999 en bespaar R500! Aanbod geldig solank voorraad beskikbaar is. Koop nou!

Plaas ’n voorafbestelling vir die Xbox One

Die vermaaksentrum wat jou alles-in-een bied – regstreekse TV, flieks, sosiale netwerke en speletjies. Plaas jou voorafbestelling nou!

Tot 50% afslag op haarsorgprodukte!

Bespaar tot 50% op professionele haarsorgprodukte by kalahari.com. Aanbod geldig solank voorraad beskikbaar is. Koop nou!

Nuwe e-boeke beskikbaar!

Maak jou gereed vir ’n lekker leeservaring wat e-boeke insluit soos Good Morning, Mr Mandela; Laaste dans, Drienie; Die brug na Haven en nog baie meer. Koop nou!

Hisense Infinity Prime-slimfoon

Bespaar R1 000 op die Hisense Infinity Prime 1-slimfoon. Nou R1 999. Aanbod geldig solank voorraad beskikbaar is. Koop nou!