Sy nuwe gesig gee Yank ’n nuwe lewe

Ná 15 jaar van kluisenaarskap het ’n 36 uur lange operasie ’n Amerikaanse man weer die geleentheid gegee om die wêreld in die oë te kyk – met ’n nuwe gesig.

Richard Lee Norris (nou 37) van Hillside, Virginië, se gesig is 15 jaar gelede in ’n skietvoorval erg geskend, berig The Washington Post.

Hy kon nie eens sy mond gebruik nie.

Norris het die laaste paar jaar verskeie operasies ondergaan.

Sy lippe, neus en die punt van sy tong is heeltemal beskadig. Die skietongeluk het wel nie sy sig belemmer nie.

Voorheen het hy met ’n bofbalpet of ’n chirurgiese masker in die strate geloop wanneer hy sy huis móés verlaat.

Hy is nooit getroud nie.

’n Gesigoorplanting was een van die min opsies wat hy oorgehad het.

Die operasie is sewe maande gelede by die Universiteit van Maryland se mediese sentrum in Baltimore gedoen.

Die dokters is baie tevrede met Norris se vordering.

“Ons as dokters doen die operasie, maar die res hang absoluut af van jou as pasiënt,” het Eduardo Rodriguez, ’n tandarts en chirurg by die sentrum, gesê.

Volgens hom is Norris vasbeslote om ’n beter lewe te hê.

Enkele dae ná die operasie is Norris van sy ventilator afgehaal en binne die eerste week kon hy skeer en sy tande borsel.

Norris wou nie self met die media praat nie, maar het in ’n verklaring geskryf toe hy die eerste keer in die spieël sy ­nuwe gesig sien, wou hy Rodriguez net omhels.

Deesdae ontvang Norris spraakterapie en gaan een tot twee keer ’n maand terug na Baltimore vir opvolgbesoeke.

Norris sal vir die res van sy lewe medikasie moet gebruik.

Nou is hy nie meer skaam om in die straat te loop nie. Hy begin selfs sosialiseer.

“Ek kan nou begin werk aan ’n lewe wat aan my teruggegee is.” – AP