Tom Cruise se 'huis van gruwels'

Los Angeles. – Die National ­Enquirer noem dit “Tom se huis van gruwels” en Tom Cruise se regsverteenwoordiger noem dit “bose, skadelike leuens”.

Bert Fields, die akteur se prokureur, dreig om die tydskrif se moedermaatskappy te dagvaar oor ’n voorbladstorie wat “deurspek is van leuens”.

Die artikel maak inligting bekend oor Cruise se onlangse egskeiding van sy vrou van die afgelope vyf jaar, die aktrise Katie Holmes, en stel die akteur en Sciëntologie-aanhanger in ’n slegte lig.

Fields kritiseer American Media Inc. in ’n brief oor ­“valse ­en gemene leuens” wat Cruise (50) skade van “honderde miljoene dollar” sal berokken.

Die tydskrif beweer onder meer dat die egpaar se dogter Suri (6) in ’n “piepklein kamer sonder vensters” gehou is totdat sy vyf maande oud was en dat Holmes (33) “feitlik ’n gevangene” in Cruise se huis was.

Sy was glo blootgestel aan “aanhoudende verbale en emosionele mishandeling, vernedering en intimidasie”.

Die tydskrif beweer ook Cruise het Holmes se kontak met haar eie familie beperk, haar voor haar familie verneder en laat huil en dat sy familie toegelaat is om haar te verneder.

Cruise het glo ook op Holmes geskree wanneer sy nie goed gedoen het wat hy haar beveel het nie.

Fields eis dat die stellings teruggetrek word indien die maatskappy ’n dagvaarding wil vermy.

Skinderwebwerwe berig Holmes het ’n weggooibare selfoon gebruik om die egskeiding teen Cruise aan die gang te sit. Dit was om seker te maak hy kom van niks te hore nie.

Sy het eerste Martin Holmes, haar pa wat ook ’n prokureur is, gebel en hy het haar aangeraai om die huwelik te beëindig.