Uitspraak eers in nuwe jaar

Den Haag. – Mnr. Shrien Dewani (31), die Brit wat daarvan aangekla word dat hy sy bruid, Anni (28), in Gugulethu buite Kaapstad laat vermoor het, sal in die nuwe jaar hoor of hy aan Suid-Afrika uitgelewer word.

Dewani se uitlewering is reeds weke gelede deur sowel me. Theresa May, die Britse minister van binnelandse sake, as ’n regter goedgekeur, maar hy het daarteen geappelleer. Gister sou die saak voortgegaan het, maar die partye het met die twee regters ooreengekom dat geen verdere getuienis nodig is nie.

Regters sir John Thomas en sir Duncan Ouseley het uitspraak voorbehou en sal op ’n datum wat nog bepaal moet word hul beslissing bekend maak.

In die hof het me. Claire Montgomery QC, sy advokaat, betoog dat Dewani “geestessiek” is en daarom nie ’n regverdige verhoor kan kry nie. Hy loop ook ’n groot risiko om deur medegevangenes aangerand of selfs verkrag te word, het sy gesê.

Daarteenoor het adv. Hugo Keith QC, vir die Suid-Afrikaanse regering, aangevoer dat die plek waar Dewani aangehou sal word, die gevangeniseenheid in die Valkenberg-kliniek, die beste in die hele Suid-Afrika is.