Verlaat Sirië, hoor SA gesante
2012-07-21 20:59
Mandy Rossouw en Suné Kitshoff
Suid-Afrika het sy diplomatieke personeel in Sirië “aangemoedig” om na buurstate te skuif uit toenemende kommer oor hul veiligheid.
So het Nelson Kgwete, woordvoerder van die departement van internasionale betrekkinge en samewerking, gister aan Rapport gesê.
Dus word die ambassade nog nie gesluit nie.
Hy wou nie uitwei oor waarom personeel “aangemoedig” word om te skuif pleks van amptelik die land te verlaat nie.
Rapport het vasgestel Shaun Byneveldt, die Suid-Afrikaanse ambassadeur in Sirië, is terug in die land. Hy het alle navrae na die regering verwys.
Intussen het Irak sy burgers in Sirië aangesê om huis toe te kom nadat die opposisiemagte teen die regering van pres. Basjar al-Assad ook teen Irakse burgers begin draai het.
Die BBC het gister berig talle Irakkese is om sektariese redes uit hul buurte geskop. Pamflette is blykbaar versprei waarin hulle aangesê word om hulle binne drie dae uit die voete te maak.
Suid-Afrika was die afgelope week opnuut onder skoot nadat hy in die Veiligheidsraad van die Verenigde Nasies (VN) geweier het om saam met die meerderheid van die lande téén die Siriese regering te stem.
Maar Ebrahim Ebrahim, adjunkminister van internasionale betrekkinge en samewerking, het Vrydag in Pretoria aan verslaggewers erken dit het “duidelik geword albei kante in Sirië is swaar gewapen”.
Hy het Suid-Afrika se besluit om buite stemming te bly verduidelik deur te sê albei kante in die konflik moet besef daar sal gevolge wees vir hul optrede.
Die resolusie was, volgens Suid-Afrika, ten gunste van die opposisie omdat dit net die Assad-regering aanspreek in vermanings oor die toekomstige gevolge vir hul dade.
Die resolusie bepaal ’n sperdatum vir ’n einde aan die gebruik van swaar wapens, vereis die onttrekking van Siriese magte aan stede en dorpe en stel sanksies voor indien die sperdatum nie nagekom word nie.
Ebrahim het verwys na onmin onder die vaste lede van die Veiligheidsraad wat gelei het tot China en Rusland se veto-stem om die besluit te kelder.
“Dit was beter vir ons om buite stemming te bly en ons kommer uit te spreek deur nie betrokke te raak in die konflik tussen die P5-lede (die vaste lede van die Veiligheidsraad) nie.”
Ebrahim sê Suid-Afrika het probeer om met die voorstanders van die resolusie te onderhandel, maar kon nie ’n ooreenkoms bereik nie.
“Hulle wou die een of ander soort politieke punt maak,” sê hy.
Dawoed Radjha (65), die Siriese minister van verdediging en ’n voormalige generaal, is Donderdag dood in ’n rebelle-aanval. Assef Shawkat, sy adjunk en swaer, het ook omgekom.
’n Voormalige minister van verdediging het later in die hospitaal gesterf en die minister van buitelandse sake en die departementshoof van nasionale veiligheid is ernstig beseer.
Die bomaanval word beskou as die grootste slag teen Assad se binnekring en toon dat die oorlog Damaskus, Assad se vesting gedurende die hele konflik, bereik het.
Tussen 8 500 en 30 000 Siriërs het ná die aanval na Libanon gevlug.