Zanu-PF wik nog oor g’n regte vir gays, doodstraf

Zimbabwe se Zanu-PF besluit nog of die party sy ondersteuners moet aanmoedig om vir of teen die land se voorgestelde nuwe grondwet te stem.

In die grondwet is daar geen voorsiening vir gay- regte nie, maar wel vir die doodstraf.

Voorts mag ’n president net twee termyne dien en “verkiesingsmaats” vir elke kandidaat is toelaatbaar, soos met die Amerikaanse verkiesingsveldtogte.

’n President sal ook van vervolging kwytgeskeld word. Ingevolge die voorgestelde grondwet sal Zimbabwe 16 amptelike tale hê, insluitende Xhosa en gebaretaal. Die gevreesde Central Intelligence Organisation (CIO) sal aan die parlement verslag doen.

Die eerste konsep is verlede maand deur die drie leiers van die koalisieregering afgekeur.

Zanu-PF se vele eise sou ’n grootskaalse herskryf vereis. Onder die vernaamste Zanu-PF-eise was wyer magte vir die president sodat hy oorlog kan verklaar sonder om die parlement te raadpleeg.

Die konsepgrondwet is wel ietwat verander en daar moet nou ’n referendum gehou word om die Zimbabwiese bevolking se gevoel hieroor te toets.