Zuma kap na Veiligheidsraad

Suid-Afrika se lomp hantering van die ­Libiese krisis het die afgelope week ’n skadu gegooi oor die land se voorsitterskap van die Verenigde Nasies (VN) se Veiligheidsraad.

Pres. Jacob Zuma was in New York om die eerste debat van die jaar in die VN se Veiligheidsraad waar te neem.

Die tema was die opbou van die verhouding tussen die Afrika-Unie en die VN.

Zuma het dit betreur dat die AU nie geraadpleeg is nie toe die Veiligheidsraad besluit het om Libië met die hulp van die Noord-Atlantiese Verdragsorganisasie (Navo) binne te val. Zuma wil egter sy brood aan albei kante gebotter hê.

Hoewel hy die Weste goed laat verstaan het “Afrika is nie ’n speelplek vir die bevordering van ander se belange nie”, wil hy ook hê Afrika moet ’n vaste setel in die Veiligheidsraad kry.

“Hoewel 70% van die Veiligheidsraad se agenda aan Afrika gewy word, het die vasteland steeds geen permanente verteenwoordiging daar nie,” het hy tydens die debat gesê.

Die Westerse lande het nie net teruggesit terwyl Zuma hulle oor Libië berispe het nie. Die Amerikaanse VN-ambassadeur, me. Susan Rice, het teruggekap en gesê die AU was te stadig met sy besluitneming en die organisasie praat nie altyd met een stem nie.

“Die AU het soms aangedui hulle voel gemarginaliseer deur die Veiligheidsraad, maar die Veiligheidsraad voel die AU is nie konsekwent in sy hantering van kwessies nie en was te stadig met optrede wat belangrike besluite betref .”

Suid-Afrika se destydse besluit om die Navo-inval te ondersteun net om dit daarna te kritiseer, het ’n bitter smaak by veral Frankryk, die VSA en Brittanje gelaat.

Zuma het gemeen hulle probeer Afrika herkolonialiseer.

Die Veiligheidsraad het ’n roterende presidentskap en elke land op die raad kry ’n beurt om die vergaderings te lei.

Dit word gesien as ’n geleentheid vir kleiner lande om hul stem te laat hoor.